Meghalaya Budget Session ṭan; February 20-ah budget pharh dawn

Meghalaya Assembly budget session chu nimin khan neih ṭan a ni. 2026-27 state budget chu February 20-ah finance changtu, chief minsiter Conrad Sangma-a'n a pharh dawn a,February 27 thleng session hi neih a ni ang.

Budget Session hi tun hnaia Ministry of Home Affairs thupek angin Vande Mataram hmanga khuh hawn a ni a, hemi hnuah hnam hla leh state hla sak a ni. Assembly complex leh a chhehvelah venhimna khauh taka kalpui a ni tih police-ten an sawi bawk.

Session ṭan ni hian governor, C.H.Vijayshankar chuan thu sawiin, state sorkar hmalakna leh hlawhtlinna hrang hrang bakah, a hmathlir neihte a sawi. Vijayashankar chuan GSDP 9.66% a ṭhan thu sawiin, an state chu ram chhunga ṭhang chak ber pahnihna a ni tih a sawi. Covid-19 hri len aṭanga kum thum chhunga a ṭhanna chu 10% vel a tling a ni, a ti. Governor chuan state economy chu kum 2018-a Rs vbc 29,508 aṭangin kum 2025-ah Rs vbc 59,626 velah a kai chho tih a tarlang bawk. Sorkarin an state tana a hmathlir a siam, 'Vision 2032', Meghalaya Excellence Framework-in a thlawp chu ram chhunga per capita income leh Sustainable Development Goals top 10-ah lantir a tum tih a sawi bawk. Governor C.H. Vijayashankar chuan state economy chu kum 2032-ah a let thuma tihpun tum a nih thu sawiin, hmasawnna chu service ṭha zawk pek, infrastructure ngelnghet leh mitin tana hun remchang zawk siamte an ni, a ti. Baghmara-a Counter Insurgency and Jungle Warfare School hawn a nih thu te, Assam-Meghalaya ramria pillar siam a nih thute a sawi bawk. Kum 2018 aṭang khan state chhunga kawng km 2,960 chaung thui siamṭhat a nih thu sawiin, PMGSY hnuaia thingtlang lama inkalpawhna kawng tam tak siam a ni bawk a ni, a ti. State chhunga thingtlang khaw 97% chuan mobile network an hman theih thu leh, khaw 6,900-ah broadband a awm tawh thu a sawi bawk.

Governor chuan kum 2025-ah Shillong Medical College hawn a ni a, health sector atana sorkar sum hman chu ram pum huap aiin a leta a tam thu a sawi. Tourism lamah pawh hma an sawn a, kum 2022 aṭang khan sum lak luh 60% dawna puangin, homestay siamte chuan mi tam tak tan eizawnna a thlen a ni, a ti. Sports infrastructure lam pawh thuam chak zel a nih thu a tarlang.

Budget session neih chhunga thu pawimawh sawi ho tur zingah dan loa lungalhthei khur siam, sum ruahman, hmasawnna program, rorelna kalphung leh sectoral reform-te a tel. February 27 thleng neih tura tih ni mah se, a ṭul dan anga pawhsei thei a nih dawn thu official-te chuan an tarlang.