Nagaland : Moava khuaa buainain ziaawm lam pan

Nagaland-a Chümoukedima district-a Moava khuaa buaina chhuak chuan ziaawm lam panin, pawikhawihna dang a thlen belh rih lo tih police official-ten an sawi. Buaina chhuak zel tur venna atan helai huam chhungah hian security force dah an ni a, thuneitute pawhin uluk takin boruak dinhmun an thlithlai reng a ni.

Moava khuaa February 13-a buaina chhuaka mi 48 vel an inhliamna hi hun rei tak chhung khaw mite leh, Chakhroma Youth Organisation (CYO)-ten ram an inchuh tawh avanga thleng a ni. An khaw chanchin tarlanna leh thu dik lo thehdarh tur venna atan Maova Village Council (VC) chuan press briefing a ko tawh bawk. VC chairman Sutminlal Vaiphei chuan Chakhroma Public Organisation (CPO)-in khua an tlawh dawn tih thu an dawng lo tih sawiin, mi 1,000 chuangin khua an pan tih chu a hnuah an hriat chauh thu a tarlang a, rang takin district thuneitute leh police-te an hriattir thu a sawi.

Vaiphei chuan buaina chhuak chu pawi a tih thu sawiin, an khua chuan eng party mah mawhpuh an duh loh thu a sawi. Kuki-ten police emaw EAC hotute emaw an bei nia sawi chu thudik lo a nih thu sawiin, council-in thuneitute a hriattir thu leh Kuki-te ngei pawhin venhimna an mamawh thu a sawi. Mipui sang chuang an pung khawm a, ṭhalai leh hmeichhiaten hliam an tuar bakah, tualchhung pastor pakhat pawhin hliam a tuar tih a sawi bawk.

Hmasawnna leh ram inchuh avanga buaina thleng sawilangin, Vaiphei chuan Maova-ah hian project engpawh thawhna atan GB leh council nen inrawnkhawmna mumal tak neih a ṭul tih a sawi. Ram chungchanga buaina awm chu Kuki-te ta a nih thu sawiin, inbiakna neih an tum a hlawhchham avangin CPO hnenah thlen a ni, a ti.