Manipur : CM leh Maj Gen Subhankar Basu inbia

Manipur chief minister Yumnam Khemchand Singh chuan Nilaini khan 57 Mountain Division, Red Shield Division tia hriat bawka an hotu, major general Subhankar Basu nen inhmuin, state-a remna leh muanna a awm theihna turin hmalakna hrang hrang an sawi dun. Meeting hi Ukhrul district-a Litan-a Naga leh Kuki-te inkara buaina a chhuah hnua neih a ni.

Ningania official thuchhuah chuan, Chief Minister Secretariat-a meeting neihah hian Prime Minister-in remna bakah hmasawnna awm theihna tura a hmathlir zulzuiin state-ah remna leh muanna, vantlang himna leh dan leh thupek kenkawh a nih theih dan turte an sawi dun tih a tarlang.

Meeting-ah hian Maj Gen Basu chuan Chief Minister hnenah security force-te'n venhimna an kalpui mek dan a hrilhfiah bawk. Chung zingah chuan multi-layered approach, internal stability, ramria venhimna leh technology hmanrua hmanga venhimna kalpui a nih dante a sawi a ni. Hei bakah state pui turin Central Armed Police Force tirh an nih thute, Multi-Agency Center leh NATGRID kaltlanga venhimna tihchak, firfiak laka dan anga hmalak bakah ramri leh hmun derthawng zual laia venhimna khauh lehzuala kalpui a nih thute pawh a sawi bawk.

Chief Minister chuan Assam khawthlang lam ramri, Jiribam district-a venhimna tihchakna tura hmalakna hrang hrang X-ah a tarlang. Jairolpokpi-a STC Complex-a 7th India Reserve Battalion infrastructure dinna tur lungphum phum a ni tih a sawi a, he hmalakna hian helai biala dan leh thupek a tichangtlung dawn a, state-a remna leh muanna awm theihna tura hmathlirte a hlawhtlin theihna turin a pui dawn a ni, a ti.