Meghalaya: Lungalhthei khur puak vanga thi mi 30 tling tawh

Meghalaya-a East Jaintia Hills-a lungalhthei khur puak vanga thi chu mi 30 an tling tawh a, hliam tuarte chu damdawi-inah enkawl mek an ni tih official-te chuan nimin Thawhlehni khan an sawi.

North Eastern Indira Gandhi Regional Institute of Health and Medical Sciences (NEIGRIMS), Shillong-a enkawl mek Raju Tamang (34) chu Thawhṭanni zan khan a thi leh bawk a ni. Hliam tuar dang pahnih- Nimaruddin leh Ramcharan Baishnab, Assam Cachar district-a Katigorah khaw mite chu Silchar Medical College and Hospital (SMCH) ah enkawl an ni. East Jaintia Hills police-te leh chhan chhuaktu pawlte chuan Mynsngat-Thangsko-a lungalhthei khura chhiatna a thlen tirh hian ft 100-a thuk aṭangin mitthi ruang 18 an la chhuak a, hemi hnuah ruang pariat lak chhuah belh leh a ni tawh.

Meghalaya sorkar chuan lungalhthei khur puah chhan chhui chiang turin judicial inquiry a din a, he chhiatna thlenga inhnamhnawih mi pahnih man an ni tawh bawk. Assam sorkar chuan mitthi chhungte hnenah Rs nuai 5 pek an ni dawn tih a puang tawh. Lungalhthei khur puakah hian Assam-a Cachar district mi pariat an thi a ni.

East Jaintia Hills thuneitute chuan dan loa lungalhthei khur siam titawp tur hian nasa takin beihpui an thlak mek a, hmun hrang hrangah dan loa lungalhthei laih chhuah ṭhahnem tak manin camp eng emaw zat chu ṭhiah a ni tawh bawk.