Tripura: Ruihhlo do runpui kalpui mek

Tripura state puma ruihhlo do runpui, anti-drug drive kalpui mekah security force-te chuan ganza chinna hmun, Rs vbc 125 man hu an tichhe tawh. Tun hnaia Assam Rifle leh Forest department ṭangkawpin Boxnagar huam chhunga beihpui an thlaknaah ganza kung nuai 1.75 vel an ti chhe tawh bawk. Official-te chuan market-ah Rs vbc 25.72 man hu a nih thu an sawi.

Security official-te chuan he an hmalakna hnuaiah hian Assam Rifle-te leh civil thuneituten thawh hona ṭha tak an neih thu an sawi. An thil tum ber chu ruihhlo zawrh chhuah a nih hmaa tihchhiat a ni tih official pakhat chuan a sawi a, ramngawah leh ramri huamchhungah beihpui thlak chhunzawm a nih thu an sawi bawk.

State-a dan loa ganza chinna hmun tihchhiat kawnga beihpui thlakna lian ber zinga mi a ni a, February 1 khan joint team-te hian Sepahijala district-a Sonamura subdivision hnuaia Dulunga forest huam chhungah ram acre 170 vela zau, plot hrang hrang 92-a ganza kung nuai nga chuang an tichhe tawh bawk. Heng ganza chinte hi market-ah Rs vbc 75 man hu vel niin an chhut.

Kumin January 28 khan security force-te chuan Sonamura subdivision-a Kamalanagar, Krishnadola, Dulunga leh Bijoy Nagar ram ngawah beihpui an lo thlak tawh bawk. Darkar kaw chhungin team-te hian ram acre 65-a zaua ganza chinna hmun 41 an tichhia a, ganza kung puitling tawh an tihchhiat hi Rs vbc 27 man hu a nih thu an sawi bawk.