Assam : CM-in Congress hruaitute lakah Rs vbc 500 defamation case theh lut

Assam chief minister Himanta Biswa Sarma chuan nimin February 10 khan, Congress hruaitu Jitendra Singh, Bhupesh Baghel leh Gaurav Gogoi-te lakah Rs vbc 500 defamation case a theh lut. He thubuai hi press conferrence-a thu dik lo leh intih hmingchhiatna lamhawia an puh vanga theh lut a ni tih Chief Minister chuan a sawi.

Thuchhuah a siamah, CM Sarma chuan civil leh criminal defamation case kalpui a tum tih sawiin, an puhna chu thu awmze nei lo leh thu dik lo a ni tih a tarlang. Mimal anga inbeihna leh politics lama intih hmingchhiat tumna a nih thu a sawi bawk. Legal action hi February 9 aṭang khan neih ṭan a nih thu a sawi.

CM Sarma chuan press conference kaltlangin Congress hruaitu, Jitendra Singh, Bhupesh Baghel leh Gaurav Gogoi-ten thu dik lo sawiin, a hming an tihchhiat thu a sawi. Congress hruaituten an puhna chu thu belhchian dawl lo a nih avangin na taka hrem a phut bawk a ni.

Sarma chuan civil suit-a hruaitu pathum hming tarlan bakah Congress hruaitu Debabrata Saikia leh press conference neihnaa inhnahnawih, mi dang chungah criminal defamation thubuai kalpui mek a ni tih a sawi bawk. Politics hmanga inbeihna leh insawichhiatna chu thil thleng tur renga a ngaih thu sawilangin, dawt leh thudik lo hmanga inbeih erawh a palzam dawn lo tih a tarlang.