Sikkim : STNM Hospital-ah kal thlak service ṭan dawn

Sikkim khawpui Gangtok-a Sir Thutob Namgyal Memorial (STNM) Hospital-ah kumin June thla aṭangin kal thlak (transplant) service kalpui ṭan beisei a ni tih health minister G.T. Dhungel chuan a sawi.

Documentation hna zawh fel vek a ni tawh a, Narayana RN Tagore Hospital, Kolkata nen Memorandum of Understanding (MoU) an peihfel thuai dawn tih Dhungel chuan a tarlang. An zawhfel hunah Sikkim-ah hian kidney transplant programme an kalpui tawh dawn a ni. Kal thlak service kalpui tur hian nasa takin hma an la tih sawiin, damlo kal thlak ngaite chuan state pawn an pan a ngaih fo thu a sawi bawk. Tunah chuan a state chhungah ngei tih theih tura peihfel a ni dawn hnai tawh tih a tarlang.

Kal thlak service kalpuina tura a tir lamah state pawn lam aṭangin mithiamte koin an thawk dawn a, state doctor-te pawh training an pe dawn tih Dhungel chuan a sawi.

Sikkim mi, kal thlak ngaite chuan Chennai emaw Kolkata an pan a ngai ṭhin a, an taksa leh rilru lamah harsatna an tawk fo tih Dhungel chuan a sawi. He harsatna sukiang tur hian kalphung dik leh mumal tak nen kumin June thla chhungin STNM Hospital-ah kidney transplant service hlawhtling taka kalpui theih kan beisei a ni, a ti.