Hmarchhakah Rs vbc 3,200 hu project thawh loh la awm

Hmarchhak bial tihhmasawnna tura project siam zingah, Rs vbc 3,200 chuang hu infrastructure project chu tun thlengin thawh lohin a la awm tih Ningani khan Parliament-ah tarlan a ni.

Minister of state for deveopment of north eastern region, Sukanta Majumdar chuan Ningania Rajya Sabha-a zawhna a chhannaah, December 31, 2025 thleng khan North East Special Infrastructure Development Scheme hnuaiah project siam tawh, la kalpui loh hi 160 chuang, Rs vbc 3,206.18 hu a awm tih a sawi.

Project tihkhawtlai hi Assam-ah tam berin project 35, Rs vbc 1,012.87 a awm a; Manipur-ah Rs vbc 441.38, Nagaland-ah Rs vbc 406.09, Aruanchal Pradesh-ah Rs vbc 395.37 hu tihkhawtlai a la ni bawk. Heng bakah project thawhna tur la pek loh hi Tripura-ah Rs vbc 308.71, Mizoram-ah Rs vbc 275.81 , Meghalaya -ah Rs vc 258.05 leh Sikkim-ah Rs vbc 107.90 a awm bawk.

Hna thawh tur tihkhawtlai zingah hian kawng siamna leh lei dawhna tur tam berin, project 53, Rs vbc 1,402.11 hu a awm. Education project tihkhawtlai pawh Rs vbc 774.55 hu a awm a, health infrastructure tihchangtlunna tur, Rs vbc 317.87 man project pawh la thawh loh a awm bawk. Heng bakah hian power, water supply, sports, toursim, digital connectivity leh civil aviation lamah hna tihkhawtlai an awm bawk a ni.

Sorkar laipui chuan kum hnih liam taa sanction tawh, project 30 thawhna tur sum ruahman chu 50% chuang la hman lohin a awm tih House a hrilh bawk. Hengte hi NESID (Roads) hnuaiah project pathum leh NESID (Other Than Roads Infrastructure) hnuaiah project 27 an ni. Hna tihkhawtlai a nihna chhan hi project thawhna tur ram chhengchhe lutuk vang te, ram leina tura buaina awm leh, clearance fel loh vangte niin official-te chuan an sawi.