Meghalaya : Reverse Buyer-Seller Meet buatsaih

Meghalaya chuan hmarchhak biala a vawi khatna atan Thawhlehni khan Reverse Buyer-Seller Meet (RBSM) a buatsaih. He hunah hian ram pawn aṭangin buyer mi 28-te leh tualchhung MSME 100 chuangte chu a hmunah hian an indawr a ni.

Ni hnih chhung awh State Convention Centre-a meet neih hi Department of Commerce and Industries leh Federation of Indian Export Organisations (FIEO) thawkdunin RAMP Scheme hnuaia an buatsaih a ni a, state-a MSME-te ram pawn hmun zau zawka an inzarpharh theihna tura duan a ni. Chief minister Conrad K Sangma chuan event hi hawngin, he hun hi state mai ni loin hmarchhak bial tan hun hlu tak a nih thu a sawi. He hmalakna hian rahṭha a chhuah bakah, hunrei tak daih thawh hona ṭha a siam a beisei thu a sawi bawk.

Sangma chuan IFAD-in a thlawp Meghalaya Livelihoods and Access to Markets Programme tarlangin, project hi tihtawp mai hlauhthawnawma a awm laiin, khawvel pum hriat hlawh zinga mi a nih tawh thu a sawi. State sumdawnna ecosystem thuam chakna tura siamṭhat an neihte sawiin dan 400 chuang tihtawp a ni a, clearance tihchangtlunna atan unified investor portal a nih thu a sawi.

Chief Minister chuan MeghaRise brand logo leh, state-level MSME Portal a tlangzarh nghal bawk. Deputy chief minister Sniawbhalang Dhar chuan meet chu hun chhinchhiah tlak a nih thu a sawi. Meet-ah hian South Africa, Canada, Australia, Russia, Kenya, New Zealand, Sri Lanka, leh Romania aiawhin buyer-te an tel a ni.