Manipur : Chief Minister thar tur Yumnam Khemchand

Manipur-a BJP Legislature party hruaitu atan kum 62 mi, MLA Yumnam Khemchand Singh chu thlan a ni a, an state-a President's Rule hman mek a tawp huna sorkar thar din a nih hunah Chief Minister thar a ni ang.

Nikum August 5 khan Parliament chuan Manipur-a Presisdent's Rule hman chu thla ruk pawhsei a remti a, hei hi February 13-ah a tawp tawh dawn a ni. Sorkar thar din a nih theihna tur chungchangah central lama BJP hruaitute chuan an party MLA bakah an thawhpui party dang MLA te chu Delhi-ah meeting an lo neihpui tawh bawk. Meeting-ah hian Meitei, Kuki-Zo leh Naga MLA te an tel a, Manipur-a BJP central observer Tarun Chugh leh hmarchhak bial in-charge Sambit Patra-te an telpui bawk.

BJP Legislature party atana thlan Khemchand hi kum 2017 - 2022 thleng khan Legislative Assembly Speaker niin, kum 2022-a Assembly inthlan neih zawh hnuah cabinet minister a ni leh bawk. Municipal Administration and Housing Development, Rural Development, Panchayati Raj, leh zirna lamte a lo enkawl tawh a ni. Khemchand hian tun hnai khan tlangram district-a Kuki khua tlawhin, hnam leh hnam inkara buaina chhuak tihtawp a duh thu pawh a sawi.

Kuki-Zo MLA, minister hlui ni bawk Nemcha Kipgen chu deputy chief minister atan ruat a ni maithei nia sawi a ni bawk. Ruat a nih chuan Manipur-a hmeichhe deputy CM hmasa ber a, Kuki-Zo hnam zinga he dinhmun chelh thei hmasa ber a ni ang.