Manipur : SpiceJet-in Imphal aṭanga Kolkata, Guwahati leh Mumbai thlunzawm dawn

SpiceJet chuan nimin January 30 khan thuchhuah siamin, a vawi khatna atan Manipur khawpui Imphal-ah service an kalpui dawn tih a puang. Kumin February 10 aṭangin Imphal aṭanga Kolkata, Guwahati leh Mumbai ah nitin Boeing 737 aircraft hmangin service an kalpui dawn tih an sawi. He hmalakna hi state-in ram chhung state lian zawk thlunzawmna tura harsatna a tawh ṭhin tihtawpna tur a ni.

Kolkata leh Guwahati aṭangin passenger-te chuan non-stop flight an nei thei dawn a, Mumbai aṭanga thlawk chhuakte chu Kolkata-ah hun rei vak lo chawlhna hun a pe dawn a, thlawhtheihna thlak a ngai tawh dawn lo a ni. SpiceJet chuan service hi Manipur tan a pawimawh tih sawiin, tualchhung buaina a thlen hnuah thlawhtheihna hmanga zin danah khuahkhirhna siam a la ni reng niin a sawi. Nitin sevice kalpui a nih chuan khawtlang mipui, zirlai, medical traveller, sorkar official leh sumdawngte tan a ṭangkai dawn hle a ni, a ti.

Kolkata, Guwahati leh Mumbai bakah, thlawhtheihna hian passenger-te SpiceJet wider network hmangin ram chhung hmun hrang hrangah leh ram pawna an zin duhnaah a hruai thei tawh bawk dawn a ni. SpiceJet chief business officer Debojo Maharshi chuan, Imphal-a thlawhtheihna service kalpui chu hmarchhak biala an inzarpharh zelna a nih thu a sawi.