Nagaland : PM-NAPS skill development drive buatsaih

Union Ministry of Skill Development and Entrepreneurship (MSDE) chuan thiamna tihhmasawn kawnga hmalakna atan Ningani khan Jubilee Memorial College, Mokokchung-ah Pradhan Mantri National Apprenticeship Promotion Scheme (PM-NAPS) awareness leh registration drive hlawhtling tak a buatsaih.

He hmalakna hian hmarchhak bial a ngai pawimawh hle a, Prime Minister Ashta Lakshmi leh Viksit Bharat, Viksit North East-te vision nen peng pakhat a ni. Mokokchung ADC Atsungba Walling chuan khawvel changkang zelah thiamna tihhmasawn leh tihpun a pawimawh thu te, degree neih ringawt a tawk loh thu a tarlang. Mahni kutkawih thiamna hmanga eizawnna chu sorkar hna aiin a ṭha zawk a ni, a ti.

National Skill Development Corporation state coordinator, Pravin Yadav chuan official Apprenticeship portal-a establishment leh zirlai inziahluh chungchangah technical session a kaihruai a, Directorate of Employment, Skill Development & Entrepreneurship joint director H Alongse chuan state-a hnathawhna hmun chungchang a tarlang bawk.

Indian Institute of Entrepreneurship, Guwahati aiawhte chuan thawh hona ṭha neih pawimawhna sawilangin, helai biala thawhpui tur neih theihna tur kawng (strategic roadmap) an tarlang bawk. Hei bakah PM-NAPS hlawhtlinna screening neih niin, sector skill council leh third-party aggregator-te nen interactive networking session neih a ni bawk.