Assam: Union Home Minister-in project Rs vbc 1,715 man hu tlangzarh

Union home minister Amit Shah chuan nimin, January 30 khan Dibrugarh-a vantlang inkhawm a hmanah, state tana hmasawnna hna thawh tur project Rs vbc 1,715 man hu a tlangzarh. He hunah hian chief minister Himanta Biswa Sarma, union minister Sarbananda Sonowal, MP, MLA leh senior official-te an tel.

Amit Shah hian legislative assembly complex pahnihna leh, MLA Hostel Rs vbc 284 senga sakna tur lungphum a phum nghal a ni. Project hmang hian Dibrugarh chu Assam-a administrative capital pahnihna atana dah tum a ni a, Dispur leh upper Assam-a rorelna tihchangtlunna tur a ni. Complex-ah hian assembly building chhawng thum a awm dawn a, MLA hostel chhawng kua, auditorium seat 800 awmna leh security-te awmna tur sak a ni ang.

Shah hian Rs vbc 238 senga sak, multi-disciplinary sports complex thawh khatna a hawng bawk a, Rs vbc 209 vel senga a thawh hnihna tur lungphum a phum bawk a ni. Facility sak zawh tawhah hian mi 30,000 ṭhutna tur a awm a, central playground leh athletic track pawh a awm. A thawh khatnaah hian indoor stadium, swimming pool, football field, multiple court leh hostel facility-te a awm bawk.

Project pawimawh thawh tur zingah ihan Rs vbc 292 senna tur, Wildlife Health and Research Centre siamna tur a tel. Hei hi ramsa enkawlna hmun siamṭhat leh forest official, ran enkawltu leh zirchiangtute inkara thawh hona tihchakma atana tih a ni. He centre-ah hian advanced laboratory, training unit, clinical block, museum leh auditorium-te dah a ni ang.

Home Minister hian National Disaster Mitigation Fund hnuaia Rs 692 chu senga wetland siamṭhatna tur project a tlangzarh bawk. Project-ah hian district pakua huam chhunga wetland 15 tuai thar, tui vawn ṭhat, tuilian tihziaawmna tur leh Brahmaputra lui kama tuilian enkawlna siamna tur a tel.