Meghalaya : Police-ten ISIS-K nena inzawm invauna poster chhui chiang

Meghalaya-a West Garo Hills police-te chuan ISIS-K helpawl nena inzawm, Tura-a Garo community-te vauna poster tar chu an chhui chiang. He poster-ah hian Garo mipui; Phubari, Rajabala, Tikrikilla, Sesla, Garobadha leh Turisori-a chengte chu kum 2027 hmaa an chenna hmuh chhuahsan tura tih an ni a, thu zawm lote lakah na taka chet a ni dawn tih tarlan a ni bawk.

He poster hi Nilaini zing khan Tura Law College, Araimile bulah hmuh a ni. West Garo Hills superintendent of police Abraham T. Sangma chuan suo moto case ziah luh a nih thu a sawi a, thubuaiah chuan mimal emaw pawl laka hlauhthawnna siam leh vantlang inrelbawlna tihbuai tumna a ni tih a tarlang. Poster hi forensic chhui chian tura thawn a ni tawh.

Police-te chuan hetianga invauna hi district dangah a thleng chhunzawm rih lo tih tarlangin, he thila inhnamhnawihte zawn chhuah tumin theihtawpa hma lak a nih thu an sawi a, he thu hi thehdarh tawh lo turin mipui an chah bawk. Deputy chief minister Prestone Tynsong chuan he pawikhawihna thleng hi ngaihthah chi a ni lo tih sawiin, a ṭul chuan central agency rawih an ni ang, a ti. Tura MP Saleng Sangma chuan thil thleng chu uluk taka chhui turin leh, hmun ralṭi zual laia enthlakna khauh zawka kalpui a ṭul thu a tarlang.