Manipur : Road safety drive kalpui

Manipur sorkar chuan National Road Safety Month vawi 37-na denchhenin, kawnga tawhsual tawh tihtlem leh lirthei khalhtute mawhphurna sanzia inhriattir nawn lehna atan road safety drive an kalpui a, traffic dan bawhchhetute pawisa an chawitir aṭangin sum tam tham tak an hmu chhuak bawk.

State traffic police-te chuan traffic dan bawhchhia thubuai 265 theh luh a ni tih tarlangin, pawisa an chawitir zat hi Rs 3,48,500 a tling tawh. Kumin campaign thupui atan 'Sadak Suraksha, Jeevan Raksha' tih hman a ni a, kawnga himna tur leh inkaihhruaina pawimawh tak takte tarlan a ni.

Manipur police-te hian kumin January 19-25 chhungin traffic dan bawhchhiate hnenah challan 188 pek chhuah a ni a, Rs 2,74,000 an hmu chhuak tawh a ni. January 18-24 chhung khan lirthei dan bawhchhia 11-te chu an lirthei hren a ni bawk. January 5-11 chhungin challan 77 pek chhuah a ni a, heta ṭanga an sum hmuh chhuah hi Rs 74,500 a ni. January 4-10 chhung khan lirthei dan bawhchhia pathum an hreng bawk.

Road safety drive hi Superintendent of Police,Traffic Control Wing-te kaihhruaina hnuaiah hmun hrang hrangah neih a ni. Campaign hi Motor Vehicle Act tlawhchhana kalpui a ni a, zan dar 10 hnu lamah sumdawnna atana hman lirthei endik ṭhin an ni.