Assam: Kaliabor-a planetarium sak peihfel hnai

Assam-a Kaliabor khuaa Shravani Satra-a Rs vbc 20.30 senna, planetarium project chu kum li dawn sak hna thawh a nih hnuah peihfel a ni hnai tawh. Project thawh hna hi chak taka kalpui mek niin kumin February 10-a sak zawh tura ruahman a ni. Planetarium hi science lam zirna leh thil thar hmuh chhuahna atan a ṭangkai dawn hle.

Project hi state sorkarin scientific temper chawikanna, science, technology leh information technology thuam chakna tura a tih niin, lungphum hi January 17, 2021 khan phum a ni. Sak zawh a nih hunah chuan facility hi state-of-the-art digital planetarium a ni dawn a ni.

Planetarium-ah hian science gallery hrang hrang a awm dawn a; zirlai, researcher-te leh mipui vantlang chhawr ṭangkai theih turin fun-oriented interactive science gallery a awm bawk ang. Complex-ah hian innovation centre a awm dawn a, ṭhalai leh naupang thiam thil tihpunna atan a ṭangkai dawn hle bawk.

Hei bakah zirna infrastructure a awm dawn a, auditorium, science park, guest house, staff quarters leh cafeteria a awm bawk ang. Official-te chuan planetarium hian science lam zirna leh hriatthiamna a pe dawn tih sawiin, Kaliabor chu educational tourism-ah a chawikang dawn a ni, an ti.