Nagaland: Dzukou valley-ah kangmei chhuak

Nagaland khawpui Kohima district-a Dzukou valley chhimthlang lamah kangmei nasa tak chhuakin, helai hmuna trekker 30 tangte chu nimin Nilaini khan chhanchhuah an ni tih official-te chuan an sawi. Trekker-te hi tlang sang lamah him taka sawnchhuah an ni. Khonoma Dzukou valley-a kum kalta December thlaa kangmei nasa tak a chhuah hnuah a thleng leh a ni.

District thuneitute leh Southern Angami Youth Organisation (SAYO) chuan kangmei darh zel tur venna atan hma an la nghal a ni. Kohima District Disaster Management Authority (DDMA) chuan kangmei hi Thawhṭanni, January 26-a chhuak a nih an rin thu an sawi a, mahse thuneitute hi Thawhlehni, January 27 khan hriattir an ni chauh thung. Kangmei chhuah chhan hriat a la ni lo bawk.

Deputy commissioner B. Henok Buchem chuan chhanchhuah hna thawk turin team a din a, kangmei darh zel tur venna atan hmanrua an neih ṭhat ang zawng zawng an hmang tih a tarlang. Kangmei chhuahna hmunah hian a ṭul dan ang zelin chhanchhuah hna thawk turin tirh an ni dawn tih a sawi bawk. Dzukou valley-a Jakhama leh Viswema entry point-ah trekking lam kaihhnawih tihtawp lailawk a ni bawk.