Tripura: Forest Conservation Area din dawn

Tripura-a chenna leilung leh ramngaw humhalh kawnga hmalaknaah, a vawi khatna atana Community Based Forest Conservation Area (CBCA) chu Vangmun Forest Range hnuaia Vangmun khuaah din tum a ni. He hmalakna hi IGDC CREFLAT Project peng pakhat tur a ni a, Mid-Term Review (MTR) team-in project kalpui tur ennawnna an neihnaah tarlan a ni.

IGDC Project chief executive officer leh project director, S Prabhu chuan Vangmun khua chuan conservation area tan hian ramngaw, hectare 60 a zau an pek thu sawiin, hei bakah hectare 200 dang pawh la belh tura rawt a ni bawk a ni, a ti.

CBCA area dinna tura ruahman hi sava chi hrang hrang leh thing leh mau awm tamna hmun a ni. Biodiversity hotspot a nih bakah, forest-based ecotourism lam pawh a chawilar phah beisei a ni. CBCA Management Committee din a ni a, committee hian ramngaw humhalh, enkawl leh hman ṭangkai dan turah ruahmanna a siam nghal ang.