Meghalaya : NEHU buaina chungchangah CM leh sorkar laipui inbia

Meghalaya chief minister Conrad K Sangma chuan North Eastern Hill University (NEHU)-a buaina thleng mek chingfel turin sorkar laipui leh NEHU thuneitute nen inbiakna an nei tih a sawi. CM chuan NEHU-a buaina thleng chu pawi a tih thu leh, zirlaite bakah hnathawktuteah nghawng ṭha lo tak a nei tih a sawi bawk.

CM Sangma chuan level hrang hrangah ministry leh minister bakah, NEHU thuneitute nen inbiakna an nei tih a sawi. NEHU chu sorkar laipui hnuaia awm a nih avangin state sorkar chu direct-a a inrawlh theih loh thu a tarlang bawk. University-a buaina thleng mek chingfel tura harsatna an tawhte pawh sawilangin, sorkar laipui enkawl institute-a inrawlh chu a harsat thu a sawi rualin, state sorkar leh education minister-te chuan NEHU official-te nen inbiakna an neih reng thu a tarlang bawk.

Sangma chuan NEHU-a hnathawkte leh an autonomy tibuai loin hma an la reng tih a sawi. University chu state sorkar thuneihna hnuaiah awm lo mah se, chinfel tumin nasa takin hma an la zel a, state mipuiin an tuar tel avangin buaina chinfel kawngah theihtawp an chhuah zel dawn tih a tarlang.

NEHU vice chancellor Prof. Prabha Shankar Shuka hi campus-ah ni 422 a awm tawh lo nia sawi a ni. Hei vang hian university tana thutlukna pawimawh hrang hrang siam kawngah harsatna a awm a ni. Acting vice-chancellor atana ruat chu nimuk December 15 khan a bang leh bawk a, a hnuah midang ruat an awm tawh rih lo. University hotu ber campus-ah a awm loh rei vang ian zirna kawngah leh inrelbawlna kawnga harsatna an tawk tih zirlaite chuan an sawi. Kumin January 12 khan NEHU Students Union chuan governor C.H. Vijayashankar hmuin, an university harsatna tawhte an thlen a, an buaina chinfel sak turin an ngen a ni.