Sikkim : Gangtok-ah Frontier State Development Workshop nei ṭan

Sikkim khawpui Gangtok-ah nimin January 14 aṭang khan hmarchhak biala hmasawnna kawnga harsatna awmte leh hmalak dan tur ngaihtuah turin Frontier State Development Workshop neih ṭan a ni. He hunah hian hmun hrang hrang aṭanga senior policymaker, administrator leh mi thiamte chuan sawihona leh technical session an neihpui a ni.

Workshop hi chawhma 10-ah ṭanin, Sikkim chief secretary Ravindra Telang chuan ramri state-te tan mumal leh hmantlak zawka ruahmanna siam a ṭul thu sawiin, hmarchhak bial chuan an chenna hmunin a zir loh vangin leh inbiakpawhna a ṭhat tawk loh avangin harsatna an tawk nasa hle a ni, a ti.

Sawi hona an neihah, chief economic adviser Dr M P Lama chuan frontier region-a economy chungchang sawiin, hmasawnna tura ruahmanna siamah khawtlang mipui an tel a pawimawh thu te, ramria hun rei tak daih hmasawnna siam chuan economy leh chenna leilung venhim kawngah a puih dawn thu a sawi.

NITI Aayog vice chairperson, Suman K Bery pawhin thu sawiin, ramri huam chhung tihhmasawn chu economy ṭhanlenna mai bakah, hun rei tak chhung remna leh muanna awm theihna atan a pawimawh thu a sawi ve bawk. NITI Aayog member prof Ramesh Chand pawhin ramri huam chhunga infrastructure leh nitin khawsak tihhmasawnna turin sorkar laipui leh state sorkarin thawhdunna ṭha an neih a ṭul tih a tarlang bawk a ni.