Meghalaya : ASHA worker-ten tiam chin awm loin nawrh huaihawt

Meghalaya-a Accredited Social Health Activists (ASHAs) chuan an harsatna neihte sorkarin a ngaihsak loh vang leh, incentive an dawn tur a tihkhawtlai sak avanga lungawi lohna lantirin, January 8 aṭang khan tiam chin awm loin nawrh an huaihawt.

ASHA worker-te hian a sum dawn tur pe tur hian sorkar an lo nawr tawh a, nikum December 19 thleng khan hun an pe a ni. Mahse, an hun pek chhunga sorkarin a pek chhuah loh avangin nawrh huaihawt mai loh chu thlan tur an nei lo tih an sawi.

Union adviser, Sonny Kharjana chuan district zawng zawnga ASHA worker-te incentive pek an nih hma chuan nawrh hi an huaihawt dawn tih a sawi. Primary leh community health centre-a dah worker tam tak chuan thla eng emaw zat sum an dawng tawh lo a ni, a ti. "Incentive an dawn tur hi tam tham lo tak a ni a, thla khatah Rs 150 - 200 inkar chauh a ni. Hetichung hian thla 5-10 te an dawng tawh lo a ni," tiin a sawi. Meghalaya-ah hian ASHA worker hi 7,000 chuang an awm mek a ni.

National Health Mission chuan sum pek chhuahna tur atan hian digital platform thar hman a ngai tawh a, a khawl lamah harsatna a awm avangin sum hi an pe chhuak thei rih lo niin an sawi ve thung.