Tripura : Gold biscuit leh pawisa fai Rs vbc 21 chuang hu man

Assam Rifles leh Directorate of Revenue Intelligence (DRI) thawk ho chuan Tripura khawpui, Agartala-a hmun hrang hrang an dapna aṭangin gold biscuit bakah pawisa fai, Rs vbc 21 chuang hu an man.

AR leh DRI hian gold biscuit tawlh luh leh thuruk a nih thu intelligence lam aṭanga an dawn hnuah beihpui an thlak a, Shantipara leh Dhaleshwar-a hmun hrang hrang an dap nghal a ni. Gold biscuit kg 15 vel an man a, hei hi international market-ah Rs vbc 19 man vel a ni. Hei bakah an hmun dapna aṭang hian pawisa fai, Rs vbc 2.87 an man tel bawk.

Tripura hi Bangladesh nena ramri inṭawm an nih avangin ramri kaltlanga dan phal loh thil tawlhluh a ni fo a, hei vang hian ramri pawh security leh intelligence agency ten an veng uluk hle.

Gold biscuit leh pawisa fai man hi chhui zui turin DRI kuta hlan a ni a, a neitute chhui chhuah an tum dawn bakah, dan khap thil tawlhnaa inhnamhnawihte pawh chhui zui an ni bawk ang. Official-te chuan an thil mante hi ram chhung hmun danga kalpui tum nia a lan thu an sawi.