Aruanchal Pradesh : ‘Take a New Turn’ tourism campaign khuh hawng

Arunachal Pradesh-a Department of Tourism chuan an state-a khualzin tam zawk hip luhna tur hma lakna thar, ‘Take a New Turn’ tourism campaign chu Thawhlehni khan New Delhi-a Arunachal House-ah an khuh hawng.

He hmalakna thar hmang hian department chuan Arunachal Pradesh chu a ram mawina chauh ni lo, culture lama a hausakna bakah a mi chengte tawn hriat hrang hrangte pho lan tel a tum a ni. Campaign hi state brand identity 'Beyond Myths and Mountains' behchhana an sian a ni. Khualzinte chu thlalaka an hmuh ṭhin, an state-a hmun leh ram mawi tam tak leh monastery-te an tlawh bakah, an chanchinte leh hnam tihdan phungte tawn hriat nei tur leh, a hnu thlengan sawi zui leh hriatreng tura tualchhung mite nen pawh inkawmna hunte nei tel ṭhin turin an sawm a ni.

Tourism minister Pasang Dorjee Sona chuan an state-in tourism lama theihna an neih hrang hrangte tarlangin heritage tourism, wildlife experiences, adventure travel, nature-based tourism, indigenous festivals, leh cultural practice dangdai tak tak a awm vek a ni, a ti.

Covid-19 hri leng zawh hnuah Arunachal Pradesh-ah hian khualzin pawh an lut tam leh tawh hle a, kum 2023 leh 2024 khan India ram chhung leh ram pawn lam aṭanga an state tlawhtu khualzin hi maktaduai khat chuang ve ve an awm a ni. An campaign siam thar hmang hian khualzin tam zawk hip luh an tum dawn tih department chuan a tarlang bawk. Hemi tan hian infrastructure bakah, kawngpui leh boruak lam aṭanga inkalpawhnate pawh changtlung leh ṭha zawka siam chhoh an tum a ni.