Meghalaya : HC-in highway contractor hna thawh khapna pawmpui

Meghalaya High Court chuan state Public Works Department (PWD) Road in highway contractor, M/s BSCPL Infrastructure Ltd leh M/s C&C Constructions joint venture (JV) , eiruk vanga an state-a kum nga chhung hna thawh a lo khapna chu a pawmpui.

PWD-in hna an thawh a khapsak chungchanga han JV hian High Court-ah petition an theh lut a; mahse justice H.S Thangkhiew chuan an petition hi a hnawlsak. State thuneitute hma lak danah tih dik loh an nei lo tiin a sawi.

Kum 2011 khan company hnenah hian NH-44E two-lane leh Nongstoin-Rongjeng-Tura kawng siamna tur project, Rs vbc 1,303.83 man pek an ni. Hna thawh tur siam belh leh thil man sang zel vangin he project pawh hi Rs vbc 2,400 ah tihsan a ni tawh. Mahse, company leh thuneitute inkara inhriatthiam lohna hrang hrang a awm hnuah, sae sorkar chuan han thawh dan leh senso te hi a enfiah ta a ni.

Document enfiahna aṭangin official, engineer leh Dispute Resolution Board member-te hnenah thilpek hrang hrang, zu chenin pek fo an ni tih hmuhchhuah a ni. Sorkar chuan he thil hi eirukna lian tak a ni, a ti. Kum 2024 September thla khan PWD chuan contractor hnenah hian show-cause notice pein, an state-a hna thawh a khapsak a ni. Mahse anni hian court lamah petition an theh lut ve leh a, court chuan hun eng maw chen a ngaihtuah hnuah, an project thawh leh public fund hman a nih dante, an chetdan dik tawk lo te avangin kum nga chhung hna thawh khapsak an ni chu thil dik tak niin a pawm ve leh ta a ni.