Tripura : Khaw vawt vangin January 10 thleng sikul khar

Tripura sorkar chuan thlasik na tak leh thli vawt a tleh tel bawk avangin an state-a sikul te chu January 10 thleng a khar a, January 12 aṭangin sikul kal ṭan a ni ang.

Sorkar chuan thuchhuah siamin, thli vawt tleh leh chhum zing nasa avangin sikul chu khar rih a ni dawn tih a sawi. He thupek hian sorkar sikul bakah aided leh private sikul pawh a huam vek a ni.Tripura ah hian khua a vawt hle a, thli vawt a tleh tel bawk avangin nitin nunphung leh sumdawnna thleng pawhin a nghawng a ni.

Tripura-ah hian primary - higher secondary level sikul 4,915 a awm a, zirlai nuai 6.80 chuang an awm. India Meteorological Department (IMD) in thli vawt hi January 10 thleng a la tleh dawn niin a tarlang a, hei vang hian sikul hi khar a ni. IMD in a tarlan danin, Tripura-a boruak vawh lam hi 22 degree Celsius leh 8 degree Celsius inkar a ni a, hei hi kum danga boruak vawh lam aiin 3-4 degree in a hniam zawk.

State sorkarin thupek a tihchhuah hma hian Tripura Tribal Areas Autonomous District Council (TTAADC) chuan an huam chhungah khaw vawt vangin January 13 thleng sikul khar a ni rih tur thu hi a lo tichhuak tawh a ni. Class X leh Class XII pratical exam neite erawh chuan exam hi an chhunzawm tho a ni.