Nagaland Baptist Church Council-in PM hnenah lehkha thawn

Nagaland Baptist Church Council (NBCC) chuan India ram chhung hmun hrang hrangah Kristiante beihna thleng ṭhin chungchangah prime minister Narendra Modi hnenah lehkha an thawn.

NBCC chuan Kristiante beihna tam chho zel, a bikin an sakhaw hun pawimawh Krismas laia a hluar zual chu ngaihven a ngai hle tih sawiin, PM hnenah hei hi rampum huap thil a ni, an ti. "Kristiante ngaimawh leh beihna pung zel chuan Kristian nih pawh thil hlauhawmawmah a chantir tawh a ni," tiin nikum January - October chhung khan India ramah Kristian beihna thleng report 600 chuang a awm a, ni khatah ṭum hnih beih tawk ang zel an ni tih an tarlang. Beihna an tawh zingah hian mipuiten kut an thlak te, zahthlak taka insiam te, biak-in inkhawm tihbuai leh an in leh lo tihchhiat sakte pawh a tel.

"Khawvela democracy ram lian ber tia inchhuang taka sawi ṭhinna ramah Krismas lawm vanga beih an tawk ringawt chu thil inhmeh lo tak a ni. Hetiang thil thleng hian sakhaw tin zalenna neih tih chu a taka chantir a tihla hle a ni," tiin an tarlang. Heng inbeihna a thlen fo laia Kristian legislator,a bikin BJP amite an ṭawng chhuak lo ṭhin chu an dem thu an sawi bawk.