Assam : Congress candidate selection panel hruaitu atan Priyanka Gandhi ruat

Congress party chuan Assam assembly inthlan lo awm tura an party candidate thlang tur, screening committee hruaitu atan Priyanka Gandhi a ruat.

All India Congress Committee (AICC) general secretary (organisation) K C Venugopal chuan kumin kum chanve hma lama assembly inthlan neihna tur, state leh Union Territory panga - Assam, West Bengal, Kerala, Tamil Nadu leh Puducherry ah screeing committee siam a nih thu a puang. Committee-ah hian member pali zel ruat an ni.

Assam screening committee chairperson-ah AICC general secretary leh Lok Sabha member, Priyanka Gandhi ruat niin member atan hian Lok Sabha MP pahnih - Imran Masood leh Saptagiri Sankar Ulaka bakah Sirivella Prasad te ruat an ni bawk. Assam inthlan lo awm turah Congress hian rorellai, BJP paihthlak tumin eptu party dangte thawhpui dan tur dap an tum.

Member 126 awmna, Assam Assembly inthlan hi March -April vel hian neih a nih rin a ni. Assembly term kal mekah rorellai BJP chuan MLA 64 neiin a thawhpui AGP, UPPL leh BPF chuan member pakua, pasarih leh pathum an vei ve bawk. Eptu party zingah Congress chu MLA ngah ber niin 26 an nei a, AIUDF in 15 leh CPI(M) in MLA pakhat an nei a, independent MLA pakhat a awm bawk a ni.

Assemby inthlan neih tur atan party hrang hrang an inbuatsaih mek. Prime minister Narendra Modi leh union home minister Amit Shah pawhin tun thla chhungin Assam an tlawh dawn niin chief minister Himanta Biswa Sarma chuan a sawi.