Meghalaya: Nakkumah ropeway project thawk ṭan dawn

Meghalaya khawpui Shillong-a ropeway project thawhna tura harsatna lian tham awmte chinfel niin, nakkum January thla aṭanga thawh ṭan tur a ni tih New Development Bank (NDB) leh state Tourism department-in review meeting an neihnaah an sawi. Riat Laban-a Lower Terminal-ah project thawh tur inbuatsaihna kalpui mek a ni.

Lower Terminal, Madan Laban Nepali Secondary School bula civil construction chu January thla aṭang hian thawh ṭan tura ruahman a ni a, Shillong Peak bula Upper Terminal-ah pawh thawh ṭan a ni thuai dawn a ni. Ropeway hi metre 896-a thui a ni dawn a, tower paruk a neih dawn bakah mi pariat ṭhut theihna a awm dawn a ni. Official-te chuan July 2027-ah zawhfel hman a ni dawn tih sawiin, June 2028 aṭanga hman ṭan theih a nih an beisei tih an tarlang.

Lower Terminal hi 'drive' station a ni dawn a, Upper Terminal chu 'return' station niin passenger facility pawimawh dah a ni bawk ang. Ropeway hian France company POMA siam, Monocable Detachable Gondola system a hmang dawn a, darkar khat chhungin passenger 600 a phur thei dawn a ni. Passenger-te chuan Shillong khawpui leh a chhehvela tlang mawi tak tak an thlir thei dawn a ni. Terminal pahnihah hian cafeteria, kiosks, dawr, thingpui leh coffee outlet, chawlh hahdamna hmun leh inthiarna a awm ang.