Tripura : Agro-forest thuam chakna turin Patanjali MoU ziahpui

Tripura sorkar chuan state chhunga forest leh agriculture product thuam chakna Patanjali Yogpeeth Trust chu thawh dunna tur, Memorandum of Understanding (MoU) pahnih a ziahpui.

Inremna an siam hnuaiah, Patanjali group hian Tripura-ah agriculture leh forest sector tan Rs vbc 400 a invest dawn a, organic farming bakah hlawk zawka thar chhuah leh natural resource hman ṭangkai lamte chu thlur bing a ni ang.

MoU hi Thawhlehni khan Agartala-a Tripura Institution for Transformation conference hall-ah state industries and commerce leh forest department leh Patanjali Yogpeeth Trust hotuten an ziak fel a, he hun hi chief minister Manik Saha pawhin a hmanpui a ni. Sorkar official eng emaw zat an tel bawk.

Chief Minister chuan Tripura sorkar leh Patanjali Yogpeeth Trust an thawk dun thei tur chu lawmawm a tih thu a sawi a, an thawh dunna hmang hian field hrang hrangah hun ṭha leh state economy lamah pawh hmasawnna a thlen ngei a beisei tih a sawi. Prime minister Narendra Modi-a'n 'New India' hmathlir a neih zulzuiin, state sorkar chuan 'New Tripura' din chhoh a tum a ni, a ti. An state chuan leilung hausakna ṭha tak a nei a, hengte hi hman ṭangkai a, a theihna hrang hranga hmasawnna thlen an tum tih a sawi. Foreign investor pawh hip luh zel an tum tih a tarlang.

Patanjali Yogpeeth Trust CEO leh managing director, Acharya Balkrishna chuan Tripura-in sector hrang hranga hma a sawn theihna tura puih an inhuam tih a sawi a, tuna an thawh dunna tur bakah religious tourism, information technology leh skill development lamah pawh thawhpui an inpeih reng tih a sawi. Tripura chu state hmasawn a nih a, kum rei lo te hnua model state a nih theihna turin an theihtawpin an thawhpui dawn tih a tarlang.