Assam: Cachar police-ten heroin Rs vbc 2.20 hu man

Assam-a Cachar police-ten ruihhlo tawlhruk do beihpui an thlaknaah, heroin gram 388, Rs vbc 2.20 man hu an man. He ruihhlo tawlhruknaa inhnamhnawih mi pathum an man nghal bawk.

Heroin hi Thawhlehni zan rei lama beihpui an thlaknaah police-te chuan ṭhenawm state aṭanga district-a lirthei tlan lut an endikna lamah an man a ni. Police-te chuan lirthei chu uluk takin an endik a, lirthei chhung compartment hrang hranga sahbawn bawm 30-ah heroin hi an man. Senior superintendent of police (SSP) Partha Protim Das chuan ruihhlo phurhna lirthei hi MZ-02C-1553 a ni tih a sawi.

An mi mante hi Dildar Hussain (25), Nazrul Hussein (20) leh Jasim Uddin (25), Dholai police station huam chhunga Bhanga Bazar-a cheng an ni a, Narcotics Drugs and Psychotropic Substances (NDPS) Act hnuaiah thubuai siamsak an ni. Police official-te chuan chhuizuina neih nghal a ni tih sawiin, he thubuai nena inzawm ruihhlo tawlhrukna network lian zawk chhui chhuah an tum tih an tarlang.

SSP Das chuan beihpui an thlakna chu helai biala ruihhlo tawlhruk tihtawpna tura an hmalakna a ni tih tarlangin, ruihhlo supply chain zawng chhuakin a inhnamhnawih apiang na taka hrem an ni dawn tih a sawi bawk. Cachar police-te chuan Thawhṭanni khan Rongpur-ah Yaba tablet 90,000, Rs vbc 26 man hu an lo man tawh bawk a, a neitu Dalim Uddin Laskar leh Abed Sultan Barbhuiya-te an man bawk a ni.