Meghalaya: MP-in ILP system hman phalsak turin nawr

Meghalaya-a Lok Sabha MP, Ricky AJ Syngkon chuan Thawhlehni khan sorkar laipui chu an state-a Inner Line Permit (ILP) system hman a nih theihna turin a nawr. Hei hi state leilung fate venhimna atan leh, an state ramri enkawlna thuam chakna turin a ṭul tih a sawi.

Ministry of Home Affairs hnena lehkha a thawnah, Syngkon chuan Meghalaya assembly chuan kum 2019, December 19 khan Bengal Eastern Frontier Regulation, 1873 hnuaiah an state-a ILP hman ve tur phutin resolution chu lungrual takin an lo pass tawh tih a tarlang. State pawn lam mi dan loa pem lut tam lutuk avanga an state leilung fate dinhmunah nghawng a neih dante an hmuh avangin, party zawng zawngte pawhin lungrual takin resolution hi an pawm a ni, a ti.

State sorkar bakah civil society group hrang hrangten ILP hman a nih theihna atan an nawr fo chungin, tun thlengin sorkar laipui chuan an ngenna hi a la tihlawhtling lo a ni. Syngkon chuan an thil phut hi Sixth Schedule hnuaia tribal area thuam chakna tur siam nen pawh inzul vek a nih thu a sawi. ILP hi hmarchhak state dang - Mizoram, Arunachal Pradesh, Nagaland leh Manipur-ah pawh hman mek niin, dan loa pem lut leh inbenbel tumte venna atana thil pawimawh tak a ni.

ILP hman chuan dan dik tak hmanga state-a lutte tan harsatna a thlen lo a, dan loa lutte venna leh an awm theih chinte hriat a, dan loa inbenbel tumte tana a ngai tih Syngkon chuan a sawi. Meghalaya chuan Bangladesh nen international border thui tak leh Assam nen ramri thui tak a nei a, heng aṭang hian dan loin an state-ah pem lut an foavangin ILP chu state security thuam chakna tura a ṭul thu a sawi. Hun rei tak siamsak tur an ngen chunga sorkar laipui lamin a tikhawtlai reng chuan mipuiah sorkar laipui rin tawk lohna a thlen thei dawn a ni, a ti bawk. Hei vang hian an ngenna ngaihtuah a, hman a nih ve thuai theihna turin Home Ministry chu state nena joint techninal committee din turin a ngen.