Tripura: Railway Ministry-in rel kawng thar siamna tur survey pawm

Railway Ministry chuan Tripura-a rel kawng thar siamna tur hmun enfiah (final location survey) phalna a pe a, rel kawng thar tur hian Jirania rel yard leh Bodhjungnagar Industrial Complex a thlunzawm ang.

Northeast Frontier Railway (NFR) chuan rel kawng hi km 14 vel a ni dawn tih tarlangin, survey kalpuina atan Rs nuai 42 vel sen a ni dawn niin an chhut. Rel kawng siamna tura ruahman hi West Tripura district hnuaia awm a ni.

NFR chief public relations officer, Kapinjal Kishore Sharma chuan Bodhjungnagar chu state-a industry leh commercial center pawimawh zinga mi a nih thu a sawi. Resource-based industry-te pui tura siam a ni a, rubber, mau leh ei leh in siam ṭhinte puihbawmna a ni tih a sawi. Rel kawng thar siam a nih chuan rang leh awlsam zawkin bungrua a phurh theih tawh dawn a, tualchhung industry leh sumdawngten an chhawr ṭangkai dawn hle a ni, a ti. Rel hmanga inkalpawhna tihchangtlun a nih chuan supply chain a tihchak dawn bakah, state economy ṭhanlenna kawngah a pui dawn tih a tarlang.