Manipur University leh NSDCI-in inremna siam

Manipur ṭhalaiten ram pawna hnathawh tur an hmuh theihna tura hmalakna pawimawh takah, NSDC International Limited (NSDCI) leh Manipur University chuan university campus-ah Japanese Language Training Center dinna tur inremna an siam.

NSDCI chief executive officer Alok Kumar leh, Manipur university registrar prof. M. Premjit Singh-te chuan vice-chancellor prof. N. Lokendra Singh leh sorkar, university thuneitute leh NSDC aṭanga senior official-te hriatpuinain inremna hi an ziak. He hunah hian IAS officer N. Bandana Devi leh senior faculty member-te bakah NSDC aiawhte an tel.

Inremna an siam hi Department of Vocational Studies and Skill Development (DVSSD), Manipur University chuan a kalpui dawn a, Japan-a hnathawk tur ṭhalaite chu ṭawng an zirtir dawn bakah, hnathawk thei turin a chher dawn a ni. He hmalakna hi India leh Japan-in Government-to-Government (G2G) inremna a siam zulzuia kalpui tur niin; healthcare, hospitality, agriculture, leh manufacturing-te a huam dawn a ni.

University vice-chancellor prof. Lokendra Singh chuan he hmalakna hi zirlaite tan hun remchang ṭha tak a siam dawn tih sawiin, center chuan state ṭhalaite tan ram pawna hna thawh theihna a thuam chak dawn tih a tarlang. College, district-level skill centre, leh community platform hmanga thawh hona siam an rawt bawk.

Manipur University official-te chuan DVSSD zirlaite chu sector hrang hrangah ram chhung leh ram pawnah hna ṭha tak tak an thawk tawh tih tarlangin, chung zingah chuan aviation, hospitality, banking, teaching, leh manufacturing-te pawh a tel. Kum hnih liam ta chhungin NSDC International puihnain alumni 28 chuan Japan-a hospitality sector-ah hna an hmu a, kum khata an hlawh zat chu Rs nuai 12 vel a ni.