Assam-in zirlai sikul kal lo tihtlemna turin SMS alert system siam

Assam-a Department of School Eduction chuan zirlai naupang, sikul kal lo awm ṭhin tihziaawma turin state puma sorkar sikul tan automated SMS alert system a siam.

He system hi Shiksha Setu Application hmanga siam niin, zirlai naupang chu a zawna ni nga sikul a kal lo a nih chuan, a nu leh pa bakah class teacher hnenah automatic-in text message hi a inthawn dawn a ni. Alert hi ni nga danah, sikul an kal loh aṭanga ni nga, a ni 10 leh ni 15-na leh a bak zelah, naupangin sikul a kal leh hma chu thawn ṭhin a ni ang. Thuneitute chuan naupangin sikul kal a ṭhulh fo chuan sikul chawlhsan, drop out duhna a awm theih tih sawiin, hemi venna atan he system hi an duang tih an sawi.

Department chuan an app kaltlang hian nitina sikul naupang leh zirtirtute kal dan chu an vil reng tih sawiin, naupang tam tak sikul ṭhulh fo chhan hi chhungkaw kaihhnawih thil a ni fo tih an sawi. Hei hi nu leh paten sikul ṭhulh foin naupangah nghawng ṭha lo a nei thei tih an hriatchian tawk loh vang a ni, an ti.

Alert system hmanga message thawnah hian, zirtirtu chuan sikul kal lo naupang hming, class leh section hmingte kimchang takin an dawng dawn a; nu leh pa te erawh chuan an fain sikul a kal lo tih message tawi an dawng thung ang. SMS hi official languange panga - Assamese, Bengali, Bodo, Hindi leh English in thawn ṭhin a ni bawk ang.

Official-te chuan he hmalakna hmang hian sikul leh zirlai naupang chhungte inkarah pawh inbiak pawhna ṭha zawk a siam a, naupangten sikul an kal ṭhat phah theih an beisei thu an sawi.