Nagaland: Dzukou Valley-ah ni 3 chhung ram kang tawh

Nagaland-a Dzukou Valley-a ram kang chuan ziaawm lam a la pa thei lo. Nimin kha a ni thumna ni tawhin a la kang chhunzawm zel. Thli a tleh nasat bawk avangin kangmei hian Japfu tlangdung a kangkai tawh a, thuneitute chu thlawhtheihna hmanga ram kang ṭhelh tura ngen an ni tawh bawk.

Official-te chuan Zirtawpni aṭanga kangmei chhuak chu khaw ro leh thli a tleh nasat avangin a darh chak hle tih an sawi a, ecosystem leh mipui himna atan a hlauhawm tih an sawi. Ram ngaw square km 1.3 vel a kang tih sawiin, kangmei hi a darh zel tih an tarlang.

District Disaster Management Authority (DDMA), Kohima official chuan district thuneituin kangmei chhuah nasat dan a zirchian hnuah, Nagaland State Disaster Management Authority kaltlangin Indian Air Force helicopter, Bambi bucket hmang chu kang ṭhelh tura rawih a rel tih a tarlang.

Thuneitute chuan ram kang hi tualchhung trekker pali, an campsite-a tihpalh thil thua kangmei an tihchhuah vang a ni tih an sawi. Trekker-te hi ram kangah hian an tang a, December 13 khan Khonoma Youth Organisation volunteer-te chuan an chhanchhuak a ni. Ram kang ṭhelh tur hian Khonoma Youth Organisation volunteer-te bakah, police, fire service, forest official-te leh disaster management personnel-te chu an hmunah hian an awm mek a ni. Official-te chuan ram kang hian Jotsoma-Khonoma ramri bul Hophera Thi a kang kai ṭan tawh tih an sawi bawk.