Meghalaya : ED-in Ponzi scam kaihhnawihah Rs vbc 17.91 hu a hrek

Enforcement Directorate (ED) chuan Pearlvine International Ponzi scheme hnuaia dik lo taka sum lakna, money-laundering case a chhui meknaah, Zirtawpni khan Meghalaya-ah property, Rs vbc 17.91 hu chu khawih chet theih lohin a hrek tih a sawi.

EDShillong Sub-Zonal Office chuan Prevention of Money Laundering Act (PMLA) 2002 hnuaiah December 10 khan bungruak hrekna hi a tichhuak. An bungrua hrek zingah hian khawih chet theih loh 12 leh khawih chet theih pasarih an tel. Inbumna sum hmanga luxury car leite pawh an tel a ni.

US-based Pearlvine International lakah hian an scheme kalpui chungchangah thu chargesheet thehluh a ni. Company hian an company zawmtu member-te chu sum a pung tam tak pek let a tiam a, membership fee hi a tlem ber Rs 2,250 an ti a ni. Kum 2018 aṭanga March 2023 thleng khan India ramah Ponzi network hi an kalpui a ni. Ram chhungah seminar te an huaihawt fo a, hei hi sum lak luhna atan hian hmangin India ramah member nuai 80 chuang an nei tawh niin vawi khat phei chu an lo sawi tawh bawk. Mahse member-a lutte an tiam angin sum an pe let lo a ni. Investigator-te chuan an scheme hmang an sum lak luh hi Rs vbc 1,575 vel a tling a niin an sawi.

A bultumtu ber hi Neeraj Kumar Gupta niin ED chuan a sawi. Gupta hian kum 2015 November thla khan pearlvine.com domain chu a lei a, hemi hnu hian investor hip luhna atan India bakah Thailand-ahte seminar a buatsaih ṭhin a ni. ED hian he inbumna kaihnawihah a hmain Rs vbc 37.97 man hu chu khawih chet theih loh turin a lo hrek tawh bawk.