Manipur : Kuki-Zo in Meitei BJP MLA chet dan dem

Manipur-a Kuki-Zo hnam chuan Meitei BJP MLA Yumnam Khemchand Singh-a'n engmah sawi lawk lo leh sawm ni lo chunga Litan Sareikhong Relief Camp a tlawh chu an dem tih an sawi.

Singh hian Thawhṭanni khan Naga hnam tamna, Ukhrul distrit-a Litan Sareikhong Relief Camp hi a tlawh a, BJP worker eng emaw zatin an zui. Relief camp in-charge, Lunkhojang Baite chuan Singh hian engmah hriattir lawk loin zing dar 9:30 velah camp-ah hian a kal a, camp-a awm tam zawk chu hnathawkin an chhuak hman tih a sawi. Camp-a naupang awmte chu thla a lakpui a, an chhuahsan leh nghal tih a sawi. MLA chetdan chu mi hmuha hmingṭhat lak tumna mai niin an sawi a ni.

Kuki Inpi Ukhrul pawhin security mi leh sa tam tak nena Singh-a'n camp a tlawh thut chu protocol bawhchhiatna leh, camp-a awmte dinhmun ngaihtuah loah an puh bawk. Camp-a awmte hmakhua ngai tak tak lo inlan leh, politics lama a hming tihṭhat a tuma mai a ni tiin, tualchhung buaina vanga in leh lo tlanchhiatsante rilru a tina hle tiin an tarlang.