Nagaland Digital Entrepreneurship leh Startup Fest hmang

Nagaland khawpui Kohima-a National Institute of Electronics & Information Technology (NIELIT) leh, Department of Information Technology & Communication buatsaihin, Nagaland Digital Entrepreneurship & Startup Fest chu Kohima-ah December 8 khan neih a ni.

Ministry of Electronics & Information Technology (MeitY) secretary, S. Krishnan chu khuallian niin, thu a sawi bawk a ni. Krishnan chuan Nagaland chu a vawikhat tlawhna a nih thu sawiin, Hornbill Festival a chhim bakah, Kisama-a World War II Museum leh, Kohima War Cemetary a tlawh tih a sawi. Kohima chuan chanchin hriatreng tlak tam tak a nei tih a sawi bawk.

Krishnan chuan kum 2010-ah ram pum digital economy chu 6-7% a nih thu sawiin, kum 2014-ah a let hnihin a pung a, kum 2023 khan 20% velin a pung tih a sawi bawk. Naga ṭhalaiten talent ṭha tak tak an nei tih sawiin, thil thar siam chhuah leh sap ṭawng an thiam hle tih a ni, a ti. Heng an thiamna ti pung tur hian NIELIT chuan mawhphurna sang tak a nei tih a tarlang. Ramchhungah NIELIT 55 awmin, 20 chu hmarchhak bialah an awm a ni.

Cyber security chungchang sawilangin, India chu ram pawn technology-ah a innghat thei lo tih a sawi. NIELIT Kohima-a Cyber Security Lab chu ram chhunga a ṭha ber pawl niin a sawi bawk. Hei bakah tunhnaia New Delhi-a AI event buatsaihah NIELIT Kohima chu a fak hle bawk a ni.

Kutkawih eizawnna (entrepreneurship) pawimawhna sawilangin, Krishnan chuan startup-te chu hna siamna atan hmun pawimawh an luah tih a sawi. Startup tam zawk leh thawhhona ṭha siam zel a pawimawh tih a sawi bawk. Programme-ah hian Krishnan chuan Digital Learning and Simulation Hub a hawng bawk a ni.