Assam : Sorkarin AAI kutah ram acre 992 hlan dawn

Assam sorkar chuan Pathianni khan Cachar district-a Doloo Tea Estate-a ram, bigha 3,000 (acre 992 vel) chu Airports Authority of India (AAI) kutah greenfield airport siamna atan a hlan dawn tih chief minister Himanta Biswa Sarma chuan a sawi.

Cabinet meeting zawha press conference-a thu a sawiah, CM Sarma chuan Silchar bula airport sakna tura ram bigha 2,500 (acre 826.45) ruahman tawh sa chu bigha 500-a tihpun a remtih thu a sawi. Cabinet chuan Silchar-a Doloo Tea Estate-a ram bigha 3,000 chu AAI kuta hlan a pawm tih a sawi bawk.

State sorkar chuan Silchar-ah hian airport thar, bigha 2,500-a zau sak a rawt a, Kumbhirgram-a facility awmsa chu defence airport a nih avangin thlawhtheihna mamawhna sang zel phuhrukna atan a tihzauh theih loh a ni. November 2022 khan state sorkar chuan Doloo Tea Estate-a cheng chhungkua 1,296 hnenah lawmthu sawina atan sum lama puihbawmna a lo pe chhuak tawh a ni.

Cabinet thutlukna dang sawilangin, CM chuan sorkarin flagship scheme Mission Basundhara hnuaiah chhungkaw 1,200 hnenah ram pek a remti tih a sawi. Hei bakah state enkawl Assam Engineering College leh, Dassault Systems India Pvt Ltd.-a joint project din tur a pawmpui bawk. Project hi sq ft 5,000 chuanga zau niin, Rs vbc 243 senga sak tur a ni. Project-ah hian aerospace leh defence, automotive leh electric vehicle course buatsaih a ni dawn tih CM chuan a sawi.