Arunachal Pradesh: Sorkar leh IIT Delhi thawkdun

Arunachal Pradesh-a technology lama hmasawnna leh, hmarchhak biala hna thawh tur tihpunna kawng khat atan sorkar leh IIT Delhi chuan inremna siamin, college zirlai leh graduate tharte tan artificial intelligence (AI) training programme a thlawnin an kalpui dawn tih official-te chuan Ningani khan an puang.

Programme hi state sorkar sponsor niin, nakkum January kar hnihna aṭangin state khawpui Itanagar-ah neih ṭan a ni ang. Kar ruk chhung offline course kalpui a ni dawn a, zirlaite chu hands-on project development zirtir an ni ang. batch tinte hi nitin darkar hnih zel session an nei dawn a ni.

Official-te chuan AI leh khawl, data analysis leh visualization, Python-based AI project development and resume building bakah hna zawn kawnga inpuahchah dan zirtirna pek a ni dawn tih an sawi. An thil tum bulpui ber chu ṭhalaite AI-driven sector-a thiamna leh chhawr tlaka zirtirna pek a ni.

State sorkar official chuan, IIT Delhi nen an thawhdunna chu state ṭhalaite AI training quality ṭha an neih theihna tur a nih thu a sawi. Industry hrang hrangah AI lama talent ṭha mamawhna a sang zel tih sawiin, hemi kawngah hian ṭhalaite chher hriam tum a nih thu a sawi bawk.