Assam : CM-in Umrangso cricket stadium hawng dawn

Assam chief minister Himanta Biswa Sarma chuan Assam Cricket Association (ACA) in cricket stadium thar Umrangso-a a sak chu December 5 hian a hawng dawn. Dima Hasao district-a Umrangso khua hi a khaw mawina avanga hriat hlawh niin, chenna leilung leh a chhehvel ti chhe loin Australia, New Zealand, South Africa leh England-a an stadium-te anga sak a ni.

Board of Control for Cricket in India (BCCI) general secretary, Devajit Saikia chuan tun hnai khan stadium hi tlawhin, North Cachar Hills Autonomous Council chief executive member Debolal Garlosa-a'n project thawhna atan ram bigha 30 a pe tih a sawi. Stadium hi Umrangso Sports Association thlawpnaa sak niin, stadium pavilion chu Chingia Tularam Senapati hming chawitir a ni bawk.

Stadium-ah hian mipui 15,000 ṭhutna gallery leh practice pitch panga a awm. BCCI leh ACA-te chuan stadium-ah hian ram chhung cricket match an buatsaih dawn tih sawiin, India ram puma player-te tan cricket centre lian tak a nih thu an sawi.

Saikia chuan tun hma chuan district-a cricket activity chu Haflong-a football ground-ah neih ṭhin a ni tih a sawi a, tunah chuan stadium thar chuan cricket khel ṭhinte tan platform ṭha tak a siamsak dawn tih a sawi bawk. Dima Hasao-a player talent nei ṭhate chu hmuh chhuah phah ngei a nih a rin thu a sawi bawk.