Meghalaya : Cabinet-in Ward's Lake-ah meeting nei

Meghalaya-ah a vawikhatna atan, Nilaini khan chief minister Conrad K. Sangma kaihhruaina hnuaiah Ward’s Lake-ah cabinet meeting neih a ni. Outdoor session hi darkar li dawn neih niin agenda 16 ngaihtuah ho a ni.

Chief Minister-in thuthar lakhawmtute a kawmnaah, Ward’s Lake-a cabinet meeting neih chu chhinchhiah tlak a nih thu a sawi. Ward's Lake chu Cherry Blossom Festival neih laia Japanese Arena an neihna hmun a nih thu sawiin, Shillong Literary Fest neih chhunzawm a ni a, kar lo awm turah cultural programme hman a ni dawn tih Sangma chuan a sawi.

Krismas leh Kumthar lawm tura inpuahchahna kalpui a nih mek rualin, festival boruak chhim theihna tur leh cabinet chu festival lawmnaa a tel ve theihna turin meeting neihna hun remchang a nih thu Sangma chuan a sawi bawk.

Cabinet meeting-a thutlukna pawimawh an siam zingah, defence thuneitute nen hun rei tak an lo nghah tawh ram lei phalna pek niin, he thutlukna hmang hian Shillong Airport runway tihzauh kalpui a ni dawn a, project pawh thawh ṭan thuai a ni dawn tih CM chuan a sawi. Airport tih zauh hna thawh zawh a nih hunah chuan thlawhtheihna lian zawk an ṭum thei tawh dawn a ni, a ti. Tender pawh kalpui mek niin, tualchhung mite leh khawtlang hruaitute nena thawh hona ṭha neih a pawimawh tih CM Sangma chuan a tarlang.