Assam : Nupui pakhat aia tam neih khapna bill pharh

Assam Legislative assembly session neih mekah, chief minister Himanta Biswa Sarma chuan Thawhlehni khan mipa tana nupui pakhat aia tam neih khapna tur bill a pharh. He bill hi pass a nih a, 'law' a chantir a nih hunah nupui pakhat aia tam neih chu pawikhawihna, kum sarih thleng lung-in tantir theihna a ni ang.

Chief Minister, Home and Political departments changtu ni bawk Sarma chuan speaker Biswajit Daimary-a'n a phalsak hnuah 'The Assam Prohibition of Polygamy Bill, 2025' hi a pharh a ni. Bill pharh hma hian eptu party, Congress, CPI(M) leh Raijor Dal MLA-te chu House aṭangin an chhuak a, an awm loh laiin bill hi pharh a ni.

Bill hi state pum, Sixth Schedule area tih lohah chuan hman vek tura tih a ni. Bill-ah hian nupui pakhat aia tam neih chu pawikhawihna lian taka tarlan niin, kum sarih tan tir theih a ni ang. Nupui nei laiin, a nupui neih zep a, mi dang a neih belh leh a nih chuan kum10 lung-in tan leh pawisa chawi tir theih a ni dawn bawk. Khapna dan hman a nih hnua nupui pakhat aia tam nei inneih tirtu chu kum hnih lung-in tan leh Rs nuai 1.50 thleng chawitir theih a ni bawk ang. Khawtlang hruaitu, nu leh pa leh enkawltu, inneih chungchanga thil dik lo awm zeptute pawh kum hnih thleng tan tir theih an ni dawn a, Rs nuai 1 chawi tir an ni bawk ang.

Nupui pakhat aia tam nei,dan thar hmanga court-in thiam loh a chantirte chu sorkar hna an dil theih dawn loh bakah, state sorkar fund hmanga hna thawhah chhawr loh tur tih a ni bawk. Sorkar scheme engmah pek loh tur tiin Panchayati Raj Institutions, Urban Local Bodies inthlanah a chuh thei dawn lo bawk a ni.