Meghalaya : Indo-Bangladesh ramriah zan curfew puang

Meghalaya-a East Khasi Hills district thuneitute chuan dan loa ramria luh ruk tum leh, helpawlin pawikhawihna an thlen hlauhthawnna a awm avangin Indo-Bangladesh ramriah zan curfew an puang.

He thupek hi district magistrate R.M. Kurbah tihchhuah niin, thla hnih chhung kalpui a ni ang. Zero Line aṭanga km khat huam chhungah zan dar 8 aṭanga zing dar 6 thleng veivah khap a ni. Kurbah chuan international ramri hmun ṭhenkhatah buaina a la chhuak reng a, dan loa pem lut, helpawl member lut, dan loa bungrua tawlhru ṭhin leh pawikhawihna thleng thei dinhmunah an awm tih a sawi.

Thuneitute chuan pawikhawihtu tam zawkte chu zan lamah an che ṭhin tih an sawi a, remna leh muanna boruak tichhe zawnga che an tam tih an tarlang. Thupek tihchhuahah chuan Bangladesh-a luh tum emaw, India ram chhunga luh tum emaw pawh khap a ni tih tarlan a ni. Dan phal loha mi panga emaw a aia tam emaw punkhawm, ralthuam leh a kaihhnawih phur, bawng, kuhva rah, sangha, meizial leh thingpuife tawlhruk a khap bawk.

District thuneitute chuan, zan curfew puan a nih chuan venhimna dinhmun a tiziaawm dawn a, ramria hmun derthawng laiah boruak ralmuang zawk a thlen dawn tih an tarlang.