Delhi-a meth kg 328 man thubuaiah Nagaland hmeichhia tel

Narcotics Control Bureau (NCB) leh Delhi police ṭangkawp chuan Chhatarpur, New Delhi-a chenna in pakhat aṭangin methamphetamine high-quality kg 328 an man a, a neitu pahnih an man zingah Nagaland hmeichhe pakhat a tel. Official-te chuan khawpui chhunga meth an man tam ber zinga mi niin an sawi.

Press Information Bureau (PIB)-in Pathiannia thuchhuah a siamah, Naga hmeichhia hi Nagaland police puihnain man a ni a, a chenna in aṭangin ruihhlote chu man a ni. Ruihhlo neitu pahnihte man an nih bakah, network nena inzawm mi dang eng emaw zat hriat chhuah an ni tawh a, a bul tumtu ram pawn lama awm pawh hriat chhuah a ni tawh bawk.

Home Ministry chuan ram pawna venhimna lama an thawhpuite nen man tumin hma an la mek tih a sawi. An mi zawn mek hi kum kalta khan Delhi-a cocaine kg 82.5 man chungchangah thubuai a lo nei tawh bawk a ni.

NCB chuan Delhi chu ruihhlo sem chhuah kawnga hmunpui ber a nih thu sawiin, ram pawn market-ah thawn chhuah ṭhin a ni, an ti. Mipuite chu National Narcotics Helpline (1933) kaltlangin ruihhlo tawlhruk chungchangah an thu hriatte report turin an ngen.