Light house project peihfel thuai a ni dawn- Tripura CM

Tripura chief minister Manik Saha chuan Akhaura Integrated Check Post bula light house project thawh mek chu, sorkar laipui hnen aṭanga fund dawn belh a nih tawh avangin zawh fel a ni thuai dawn tih a sawi.

Project hi technical lam thil avangin hun eng emaw chen tihkhawtlai a ni. A tir lama Detailed Project Report (DPR) an siam pawh sorkar laipui nen inbiakna an neih hnuah siamṭhat a ni. Sorkar laipuiin project atana sum a pek belh hnuah, flat lei tura inziaklutte tan peihfel thuai a ni dawn tih CM chuan a tarlang.

Project hi prime minister Narendra Modi chuan January 2021 khan lungphum a lo phum tawh a ni. Mahse harsatna eng emaw avangin zawh hun tihkhawtlai a ni a, sorkar laipui aṭanga fund an dawn belh hnuah hna thawh chhunzawm a ni tawh a ni.

CM Saha chuan state sorkarin Agartala, Udaipur, leh Dharmanagar-ah satellite township siam a tum tih a sawi bawk. Heng khaw pathumah hian mipui cheng an tam tawh tih sawiin, harsatna tihziaawmna atan satellite township siamna turin ram pawh an hmuh tawh thu a tarlang.