Arunachal Pradesh : Walong indona hmun khualzin tlawh theihin siam dawn

Arunachal Pradesh sorkar chuan kum 1962-a indona thlenna hmun, Walong chu khualzin tlawh theihin tourism hub lian takah a siam dawn tih deputy chief minister Chowna Mein chuan a puang.

Deputy Chief Minister hian Pathiannia Anjaw district-a Walong-a indona thleng hriatrengna vawi 63-naa hun hmanah he thu hi a puang a ni. Sorkar chuan helai hmun hi inkalpawhna ṭha zawk leh, culture leh tourism facility thar hmanga thawmṭhat a tum tih a sawi bawk.

Chowna Mein chuan Walong-a indona a thlen laia sipai nunna chante chu ram leh hnamin a hre reng tawh dawn tih a sawi. Kibithoo, Namti leh tri-junction chhehvela hmun chhengchhe takah China sipai 4,000 vel laka India sipai 800-in ni 27 chhung an ram an venhim dan chungchang a sawilang a ni.

Mein chuan Walong chu khualzin tlawh tamna hmun ni tura hmalakna an kalpui mek leh rawtna an siam thu a sawi a; kumtina neih ṭhin sunrise festival, indona hriatrengna museum siam tum a nih thu te, kawng bakah digital connectivity tihchangtlun tum a nih thute a sawi.