Manipur : Governor-in ruihhlo tawlhrukna network tichhe turin hriattir

Manipur governor Ajay Kumar Bhalla chuan Thawhṭanni khan state-a security agency-te chu ruihhlo tawlhrukna network ti chhe tur leh, ramria venhimna khauh zawka kalpui bakah district derthawng zualahte beihpui thlak turin a hriattir tih Raj Bhavan thuchhuah chuan a tarlang.

State Level Narco Coordination Centre meeting vawi 10-na, Governor House-a neihah Governor Bhalla chuan ruihhlo leh a kaihhnawih tawlhruk bakah opium leh ganza chin hluar a nih dante a sawilang. Meeting-ah hian Chief Secretary, DGP leh senior officer dangte bakah dan kengkawhtu leh, security agency aiawhte an tel a ni.

Meeting-ah hian Manipur-a ruihhlo tawlhrukna, dan loa opium leh ganza chin bakah, ruihhlo hmansualna pung mek chungchangte sawi ho a ni bawk. Police, NAB leh a kaihhnawih department-te chuan chipchiar takin an zirchianna an tarlang a ni. Governor chuan ruihhlo do kawngah dan kengkawhtute leh, security agency-te chu thawh hona ṭha an neih a pawimawh thu a sawi.

Department kaihhnawihte chu dan phal loh opium leh ganza chinna hmun chak zawka tihchhiat hna kalpui tur leh, thubuai siamsak bakah rang zawka an chungthu ngaihtuah a, thiam loh chantir an nih theihna tura hma la turin hriattir an ni bawk.