Nagaland : Sorkar leh Air India Express thawk dun

Nagaland sorkar chuan Hornbill Festival 2025 travel partner atan Air India Express chu official-in a ruat. Festival hi December 1-10 chhungin heritage village, Kisama-ah neih a ni dawn. Hornbill festival hi ram chhung mai ni lo, khawvel huap pawhin hriat a hlawh tawh hle.

Thawhṭanni khan Gurugam-aairline headquarters-ah travel partner atana Air India Express ruat a nih thu hi puan a ni. He hunah hian advisor to the chief minister leh chairman of the investment & development authority of Nagaland (IDAN) Abu Metha leh Air India Express managing director Aloke Singh-ten an telpui a ni.

Nagaland chief minister Neiphiu Rio chuan Air India Express nen thawh dunna an siam chu lawmawm a tih thu sawiin, hei hi inkalpawhna tihchakna pakhat a nih bakah India ram hmun dang leh ram pawn thlenga Nagaland pho chhuah a, state tlawhtuten tawnhriat ṭha tak an neih theihna tura hmalakna pawimawh tak a ni, a ti. An thawh dunna chu state tourism, culture exchange, leh economy hmasawnna thlenna tur atana hman ngei an tum tih a sawi bawk.

Air India Express chuan November 20 leh 30 inkara Dimapur direct-a pan tur leh, one-stop flight-a thlawhtheihna ticket book-te chu 15%-in tihtlawm a nih thu an puang nghal a ni. An thawh dunna hnuaiah airline chuan artist leh event buatsaihtute zin veivahna tur an buaipui dawn bawk. Hei bakah Air India Express chuan Hornbill Experience Kiosk chu festival chhimtute tan Dimapur Airport-ah a hawng bawk ang.