Assam : Election Commission-in electoral roll Special Revision nei ṭan

Assam Election Commission chuan nakkum assembly inthlan lo awm tur inpuahchahna atan nimin, Thawhlehni khan electoral roll Special Revision (SR) a kalpui ṭan. State puma neih tur SR hmang hian vote nei thei zawng zawngte chu nakkum January 1 aṭangin voter list-ah dik taka dah luh tum an ni.

Summary Revision (SIR) ang loin Special Revision-ah chuan field verification neih a ni dawn. Booth Level Officer (BLO)-te chuan district tinah chenna in an tlawh dawn a, voter-te chu an inah ngei an finfiah zel dawn a ni. Official-te chuan BLO-te hian voter chu a la dam ngei em tih leh an chenna hmun ziahluh nen a inmil em tih an endik dawn tih an tarlang.

Voter list-a chuang thi tawh an awm chuan Form 7 hmangin an hming chu electoral roll aṭanga paih a ni ang. Assam-a cheng, state danga vote neite chu BLO-te chuan Form 8 hmangin Assam voter list-ah an dah lut bawk dawn a ni. An chenna hmun sawn tawhte chu Form 8 hmangin an chenna hmun thar hmingin an inziaklut leh thei bawk dawn a ni.

BLO-te hian data an lakkhawmte chu draft roll tih chhuah a nih hmain a dik leh dik loh an enfiah leh vek ang. Polling station pakhata vote thlak tur tam lutuk tur tihtlemna atan, commission chuan booth pakhatah vote thlak tur mi 1,200 aia tam awm lo turin an rel. State pumah polling station 1,826 vel siam belh a ngai dawn nia sawi a ni bawk.